மூலம்.. அதிர்ஷ்ட காலம்; ஞானக்காரகனும், ஞான மோட்சக்காரகனும் இணைந்து நின்று வழிநடத்தும் உங்களுக்கு, விசுவாவசு முன்னேற்றமான ஆண்டாக இருக்கும். தடைபட்ட வேலை நடந்தேறும். எடுக்கும் முயற்சி வெற்றியாகும். அதிர்ஷ்ட வாய்ப்பு தேடி வரும். படிப்பு, வேலை, திருமணம், வீடு, வாகனம் என்ற கனவு நனவாகும். செல்வாக்கு உயரும். மனக்குறை விலகும்.

சனி சஞ்சாரம்:  

மார்ச் 6, 2026 வரை 3ம் இடமான முயற்சி ஸ்தானத்தில் சகாய சனியாக சஞ்சரிக்கும் சனி பகவான், முன்னேற்றங்களை உண்டாக்குவார். அச்சமின்றி செயல்பட வைப்பார். எடுக்கும் முயற்சிகளை வெற்றியாக்குவார். அரசியல்வாதிகள் செல்வாக்கை உயர்த்துவார். தொண்டர்களின் ஆதரவை அதிகரிப்பார். குறையொன்றும் இல்லை என சொல்ல வைப்பார். சங்கடம் ஏதுமில்லை என நினைக்க வைப்பார். தன்னம்பிக்கை, தைரியத்தை அதிகரிப்பார் என்றாலும், ஜூலை 23 – நவ.18 காலத்தில் சனி பகவான் வக்ரமடைவதால் பலனில் மாற்றம் உண்டாகும்.

ராகு, கேது சஞ்சாரம்:  2025 ஏப்.26 முதல் ராகு, முயற்சி ஸ்தானத்திலும், கேது பாக்கிய ஸ்தானத்திலும் சஞ்சரிப்பதால் இதுவரை இருந்த நெருக்கடி காணாமல் போகும். நினைத்தது நடந்தேறும். எதிர்பார்த்த வரவு உண்டாகும். பெரியோர் ஆதரவும், இறையருளும் கிடைக்கும். தொழில், வியாபாரம் முன்னேற்றம் பெறும். திறமை வெளிப்படும். முயற்சிக்கேற்ற ஆதாயம் முன்னேற்றம் உண்டாகும்.

குரு சஞ்சாரம்: 

உங்கள் ராசிக்கு 6ல் சஞ்சரிக்கும் குரு, மே 11ல் 7ல் சஞ்சரித்து, அக். 8 முதல் அதிசாரமாக கடகத்திற்கு பெயர்ச்சியாகிறார். நவ.18ல் கடகத்தில் வக்ரமாகி, டிச.21ல் மீண்டும் மிதுனத்திற்குள் வக்ரமாக பிரவேசிப்பவர் 2026 மார்ச் 17 ல் அங்கே வக்ர நிவர்த்தியடைகிறார். குரு பகவான் வக்ரம் அடையும்போது முன்பிருந்த ராசியின் பலனைத் தரக் கூடியவர் என்பதால் கடகத்தில் வக்கிரமாக சஞ்சரிக்கும் போது மிதுன குருவின் பலனையே தருவார். இதனால், மே 11 வரை 6ல் சஞ்சரிக்கும் குரு பகவான் எதிரி தொல்லை, நோய், குழப்பம் தந்தாலும் அவரது பார்வைகள் 10, 12, 2 ம் இடங்களுக்கு உண்டாவதால் தொழில் முன்னேற்றம் பெறும். பணியில் இருந்த பிரச்னை விலகும். சிலருக்கு எதிர்பார்த்த வேலை கிடைக்கும். சுபச்செலவு அதிகரிக்கும். குடும்பத்தில் நிம்மதி இருக்கும். அதன் பின் 7ல் சஞ்சரித்து உங்கள் ராசி, லாப, சகாய ஸ்தானத்தை பார்க்கும் குரு, பொன்னையும், பொருளையும், புகழையும் தருவார். பிறர் ஆச்சரியப்படும் வகையில் முன்னேற்றம் தருவார்.   திருமண வயதினருக்கு திருமணம், சிலருக்கு மறுமணம், குழந்தை பாக்கியம், வேலை வாய்ப்பு, பணப்புழக்கம் என உங்கள் நிலையை உயர்த்துவார்.

சூரிய சஞ்சாரம்: பாக்கியாதிபதியான சூரியன் மே 15 – ஜூன் 14, செப். 17 – நவ. 16, 2026 பிப். 13 – மார்ச் 14 காலங்களில் நன்மைகளை அதிகரிப்பார். உடல் நிலையில் சங்கடத்தைப் போக்குவார். எதிரியை பலமிழக்க வைப்பார். போட்டியாளர்கள் நிலையை மாற்றுவார். வழக்கில் வெற்றி தருவார்.  தொழிலில் லாபத்தை அதிகரிப்பார். புதிய தொழில் தொடங்க வைப்பார். அரசு வழியில் ஆதாயம் தருவார். எதிர்பார்த்த வேலையில் அமர வைப்பார். பணவரவை அதிகரிப்பார். எடுக்கும் முயற்சியை வெற்றியாக்குவார்.

செவ்வாய் சஞ்சாரம்: செப். 14 – அக். 27,  2026 பிப். 22 – ஏப். 1 காலங்களில் வியாபாரம், தொழிலில் லாபத்தை அதிகரிப்பார். சங்கடங்களில் இருந்து விடுவிப்பார். நீங்கள் எடுக்கும் வேலைகளை முடித்திடக் கூடிய அளவிற்கு சூழ்நிலையை உருவாக்குவார். தன்னம்பிக்கையை அதிகரிப்பார்.

பொதுப்பலன்: 

உங்கள் வாழ்வில் விசுவாவசு யோகமான ஆண்டாகும். நீண்டநாள் கனவு நனவாகும். வியாபாரம், தொழில், உத்தியோகம், குடும்பத்தில் இருந்த நெருக்கடிகள் விலகும். படிப்பு, வேலை, திருமணம், உத்தியோகம், சொத்து, சுகம் என அனைத்தும் அடைவீர்கள். அரசியல் வாதிகளின் செல்வாக்கு உயரும். கலைஞர்கள் கனவு நனவாகும்.

தொழில்: 

இதுவரை இருந்த நெருக்கடி நீங்கும். மூடிய தொழிற்கூடங்கள் மீண்டும் திறக்கப்படும். புதிய தொழில் தொடங்கும் முயற்சி வெற்றியாகும். அரசு வழியில் எதிர்பார்த்த அனுமதி கிடைக்கும். பைனான்ஸ், நிதிநிறுவனம், ஷேர் மார்க்கெட்,  ஜூவல்லரி, எக்ஸ்போர்ட், ஆன்லைன் வர்த்தகம், கம்ப்யூட்டர், ஐ.டி தொழில்கள் முன்னேற்றம் பெறும். 

பணியாளர்கள்: பணியாளர்களுக்கு எதிர்பார்த்த இடமாற்றம், பதவி உயர்வு கிடைக்கும். தனியார் நிறுவனங்களில் பணிபுரிவோரின் கவலை தீரும். ஊதிய உயர்வும் எதிர்பார்த்த சலுகை கிடைக்கும். சிலர் இருக்கும் இடத்தை விட்டு வேறு நிறுவனத்தில் வேலையில் சேர்வீர்கள்.

பெண்கள்: 

வாழ்வில் எல்லாவிதமான நன்மையையும் தரும் ஆண்டாக இருக்கும். உடல்நிலை, மனநிலை சீராகும். உயர்கல்வி, வேலை, திருமணம், குழந்தை பாக்கியம், கணவரின் அன்பு, பொன் பொருள் அந்தஸ்து என எல்லாம் கிடைக்கும். வேலையில் இருந்த நெருக்கடி விலகி எதிர்பார்த்த உயர்வு கிடைக்கும். சுயதொழில் செய்து வருபவர்கள் முன்னேற்றம் அடைவர்.

கல்வி 

மே 11 முதல் ராசிக்கு குருபார்வை உண்டாவதால் பொதுத்தேர்வு, போட்டித்தேர்வு முடிவுகள் சாதகமாகும். உயர்கல்வி கனவு நனவாகும்.

உடல்நிலை: 

இதுவரை இருந்த பாதிப்பு விலகும். இடுப்பு, தொடைப்பகுதிகளில் சிறு பாதிப்புகள் தோன்றி மறையும். பரம்பரை நோய்கள், சுவாசப் பிரச்னைகள், இதய நோய்கள், தொற்று நோய்களில் இருந்து விடுதலை கிடைக்கும். ஆரோக்கியம் சீராகும். சுறுசுறுப்பாக செயல்படுவீர்கள்.

குடும்பம்: 

குடும்பத்தில் ஏற்பட்ட பிரச்னைகள் விலகும். கணவன், மனைவிக்குள் ஒற்றுமை அதிகரிக்கும். சொத்து, வீடு, வாகனம் வாங்குவீர்கள். பிள்ளைகள் உங்கள் நிலையறிந்து செயல்படுவர். குடும்பத்தில் சுபநிகழ்ச்சி நடந்தேறும். உறவினர்கள் உங்களின் வளர்ச்சியைக் கண்டு ஆச்சரியம் அடைவர். 

பரிகாரம்: அபிராமி அம்மனை வழிபட்டால் வாழ்க்கை வளமாகும்.