சித்திரை.. செயலில் கவனம்: உங்கள் நட்சத்திர நாதனான செவ்வாய்க்கு ராகு, கேது இருவரும் பகைவர்கள் என்றாலும், கோச்சார சஞ்சாரத்தின் போது அவர்கள் தாங்கள் சஞ்சரிக்கும் இடத்திற்குரிய பலன்களை வழங்க வேண்டியவர்களாகிறார்கள். சித்திரை 1, 2 ம் பாதங்களில் பிறந்தவர்களுக்கு ராகு, சத்ரு ஜெய ஸ்தானத்திலும், 3,4ம் பாதத்தினருக்கு பூர்வ புண்ணிய, புத்திர ஸ்தானத்திலும் சஞ்சரிக்கிறார். கேது, சித்திரை 1, 2 ம் பாதத்தினருக்கு விரய ஸ்தானத்திலும், 3, 4 ம் பாதத்தினருக்கு லாப ஸ்தானத்திலும் சஞ்சரிக்கிறார்.

இதனால் 1, 2 ம் பாதத்தில் பிறந்தவர்களுக்கு ஒன்றரை ஆண்டுக்கு ராகு யோகப் பலன் வழங்குவார். இதுவரை இருந்த சங்கடம் எல்லாம் இக்காலத்தில் இல்லாமல் போகும். தொட்டதெல்லாம் வெற்றியாகும். குடும்பம், தொழில், வேலை அனைத்தும் முன்னேற்றம் அடையும். எதிர்ப்பும், தடையும், வழக்கும் இருந்த இடம் தெரியாமல் போகும். உடல்நிலை சீராகும். 3,4ம் பாதத்தினருக்கு வாழ்க்கைத் துணையாலும், குழந்தைகளாலும் கவலை அதிகரிக்கும். பூர்வீகச் சொத்தில் பிரச்னைகள் உண்டாகும். குழந்தைப் பிறப்பில் சங்கடம் ஏற்படும். வருமானம் குறையும். எதிரி தொல்லை அதிகரிக்கும். பல வகையிலும் நெருக்கடி தோன்றும்.

கேது, சித்திரை 1,2 ம் பாதத்தினருக்கு வீண் குழப்பம், பயத்தை உண்டாக்குவார். பல வகையிலும் செலவை அதிகரிப்பார்.  உறவினர் வகையில் தொல்லையை ஏற்படுத்துவார். வீண் அலைச்சலை ஏற்படுத்துவார். திட்டமிட்ட வேலைகளில் மாற்றத்தை உண்டாக்குவார். உடல் பாதிப்பை ஏற்படுத்தி மருத்துவச் செலவை ஏற்படுத்துவார். 3, 4 ம் பாதத்தினருக்கு, லாப கேது, வருமானத்தை அதிகரிப்பார். தொழிலில் முன்னேற்றத்தை உண்டாக்குவார். நீண்ட நாளாக வராமல் இருந்த பணம் வந்து சேரும். வேலையில் முன்னேற்றம் ஏற்படும். விஐபிகளின் ஆதரவு கிடைக்கும். குடும்பத்தில் சுபநிகழ்ச்சிகள் நடந்தேறும். சுபிட்சமான நிலை ஏற்படும். ஆடை, ஆபரணம் சேரும்.  விலகிச் சென்ற உறவினர்களும் சொந்தம் கொண்டாடுவர். எதிர்பாலினரால் ஆதாயம் உண்டாகும். நினைத்த வேலைகள் நினைத்தபடி நடந்தேறும். செல்வாக்கு உயரும்.

சனி சஞ்சாரம்:  கும்பத்தில் ராகுவும், சிம்மத்தில் கேதுவும் சஞ்சரிக்கும் நாளில் சனி பகவான் கும்பத்தில் ஆட்சியாக சஞ்சரிக்கிறார். 2026 மார்ச் 6ல் மீன ராசிக்கு பெயர்ச்சி ஆகிறார். இதனால் 1, 2 ம் பாதத்தினருக்கு மார்ச் 6 வரை நினைத்ததை சாதிக்கும் நிலை உண்டாகும். எடுக்கும் முயற்சிகள் வெற்றியாகும். தடைபட்ட வேலைகள் நடந்தேறும். அரசியல்வாதிகளுக்கு செல்வாக்கு உயரும். எதிரி தொல்லை இல்லாமல் போகும். உடல்நிலை சீராகும். இழுபறி விவகாரம் முடிவிற்கு வரும். மார்ச் 6 முதல் இந்த நிலை மாறும். குடும்பத்தில் குழப்பம், பிரச்னைகள் தோன்றும். அரசியல்வாதிகளின் செல்வாக்கு மங்கும். கூட்டுத்தொழிலில் நெருக்கடி உண்டாகும். 3, 4ம் பாதத்தினருக்கு மார்ச் 6 வரை மன சஞ்சலம், குடும்பத்தில் நிம்மதியற்ற நிலை, வாழ்க்கைத் துணையுடன் பிரச்னை, பிரிவு, பிள்ளைகளால் நெருக்கடி அவமானம், பூர்வீகச் சொத்தில் பிரச்னை, வழக்கு, தகுதியற்ற காதல் என போராட்டமாகவே இருக்கும். மார்ச் 6 முதல் இந்நிலை மாறும். மனமும் உடலும் தெளிவடையும். நெருக்கடியில் இருந்து மீள்வீர்கள். வியாபாரம், தொழில், குடும்பத்தின் மீது அக்கறை அதிகரிக்கும். ஏளனமாகப் பார்த்தவரும் ஆச்சரியப்படும் வகையில் உங்கள் நிலைமை மாறும். உயர்வு உண்டாகும்.

குரு சஞ்சாரம்: மே 11 வரை ரிஷபத்திலும், அதன்பின் மிதுனத்திலும், அக். 8 முதல் கடகத்திற்கு அதிசாரமாகவும் செல்பவர், நவ.18 முதல் அங்கு வக்கிரமடைகிறார். அதே வக்கிர நிலையில் டிச.21ல் மிதுனத்திற்கு வருபவர் 2026 மார்ச் 17ல்  வக்கிர நிவர்த்தி அடைகிறார். அங்கிருந்து மே 26ல் கடகத்திற்கு பெயர்ச்சியாகிறார். இந்த நிலைகளால், 1, 2 ம் பாதத்தினருக்கு மே 11 வரை நினைப்பது நடக்கும். முயற்சிகள் வெற்றியாகும். செல்வாக்கும் அந்தஸ்தும் உயரும். பட்டம், பதவி கிடைக்கும். சொந்த வீடு, சொத்து, வாகனம், திருமணம், குழந்தை பாக்கியம் என்ற கனவு நனவாகும். மே11 க்கு பிறகு பண வரவில் தடை உண்டாகும். பார்த்துவரும் வேலையில் பிரச்னைகள் தோன்றும். 3, 4 ம் பாதத்தினருக்கு மே 11 வரை நெருக்கடி உண்டாகும். யோசிக்காமல் செயல்பட்டு பண இழப்பு, மரியாதை இழப்பு என சங்கடப்படுவீர்கள் என்றாலும் குடும்ப நலனைப் பாதுகாப்பீர்கள். மே11 க்கு பிறகு பாக்கிய குருவால் எடுக்கும் முயற்சிகள் வெற்றியாகும். சொத்து, சுகம், வீடு, வாசல், வண்டி, வாகனம் என்ற கனவுகள் நனவாகும். திருமண வயதினருக்கு மணமாலை ஏறும். சிலருக்கு குழந்தை பாக்கியம் உண்டாகும்.

பொதுப்பலன்: சித்திரை 1, 2 ம் பாதத்தினருக்கு ஒன்றரை ஆண்டுக்கு ராகுவும், மார்ச் 6 வரை சனியும், மே11 வரை குருவும், அதன்பின் அவருடைய பார்வைகளும் யோகத்தை வழங்கும். நீண்டநாள் கனவு நனவாகும். குடும்பம், தொழில், வேலையில் இருந்த பிரச்னைகள் விலகும். புதிய சொத்து சேரும். பட்டம், பதவி, அந்தஸ்து, செல்வாக்கு உயரும். 3, 4 ம் பாதத்தினருக்கு ஒன்றரை ஆண்டுக்கு லாப கேதுவும், மார்ச் 6 முதல் சத்ரு ஜெய ஸ்தான சனியும், மே11க்கு பிறகு பாக்ய குருவும் சுபப் பலன்களை வழங்குவர். தடைபட்ட வேலைகள் எல்லாம் நடக்கும். புதிய முயற்சிகள் வெற்றியாகும். அரசியல்வாதிகள் செல்வாக்குடன் திகழ்வர்.  பணியில் முன்னேற்றம் ஏற்படும். எதிர்பார்ப்பு நிறைவேறும்.

தொழில்: 1, 2 ம் பாதத்தினருக்கு 6ம் இட ராகு, 2026 மார்ச் 6 வரை சனி, மே 11 வரை பாக்ய குருவும், 3,4ம் பாதத்தினருக்கு லாப கேதுவும், மார்ச்6 முதல் 6ம் இட சனியும், மே11 முதல் பாக்ய குருவும் முன்னேற்றத்தை வழங்குவர். செய்து வரும் தொழில் முன்னேற்றம் அடையும். அரசு வழியில் எதிர்பார்த்த அனுமதி கிடைக்கும். ஒப்பந்தப்பணி, நிதி நிறுவனம், குடிநீர், குளிர் பானம், ஏற்றுமதி இறக்குமதி, ஜவுளி, ஜூவல்லரி, பேன்சி ஸ்டோர், ஷேர் மார்க்கெட், டிரான்ஸ்போர்ட், விவசாயம், உணவு பொருட்கள், மளிகை, கல்வி, பப்ளிகேஷன்ஸ் துறைகளில் லாபம் அதிகரிக்கும்.

பணியாளர்கள்: பணிபுரியும் இடத்தில் ஏற்பட்ட பிரச்னைகள் முடிவிற்கு வரும். நிர்வாகத்தில் நல்ல பெயர் உண்டாகும். எதிர்பார்த்த சலுகைகள் கிடைக்கும். பணியாளர்களுக்கு விசாரணை முடிவு சாதகமாகும். எதிர்பார்த்த இடமாற்றம், பதவி உயர்வு கிடைக்கும்.

பெண்கள்: குடும்பத்தில் இருந்த நெருக்கடிகள் விலகும். திருமண வயதினருக்கு மாங்கல்யம் ஏறும். குழந்தை பாக்கியம் உண்டாகும். உறவினர், நண்பர்களால் ஏற்பட்ட பிரச்னைகள் முடிவிற்கு வரும். கணவரின் ஆதரவால் மனதில் இருந்த குழப்பம் விலகும். பணிபுரியும் இடத்தில் செல்வாக்கு உயரும். சுயதொழில் செய்வோருக்கு வருவாய் அதிகரிக்கும்.

கல்வி: பொதுத் தேர்வு,  போட்டித்தேர்வு முடிவுகள் சாதகமாகும். எதிர்பார்த்த மதிப்பெண் கிடைக்கும். பெற்றோரின் கனவுகளை நனவாக்குவீர்கள். எதிர்பார்த்த பாடப்பிரிவில் இடம் கிடைக்கும்.

உடல்நிலை: பரம்பரை நோய், தொற்று நோய் என சங்கடப்பட்ட நிலை மாறும். சனி, ராகு சஞ்சாரம் சாதகமாக இருப்பதால் பெரியதாக பயமுறுத்திய நோய்கள் இருந்த இடம் தெரியாமல் போகும்.

குடும்பம்: சமூகத்தில் உங்கள் நிலை உயரும். பொன், பொருள், சொத்து சேரும். உங்கள் வளர்ச்சியைக் கண்டு உறவினர்கள் ஆச்சரியப்படுவர். கணவன், மனைவிக்குள் இருந்த பிரச்னைகள் முடிவிற்கு வரும். பிள்ளைகளின் நலனில் அக்கறை அதிகரிக்கும். சிலர் புதிய வீட்டில் பால் காய்ச்சுவீர்கள்.

பரிகாரம்: கருமாரியம்மனை வழிபட சங்கடங்கள் விலகும்.